الضنين - سفر الدغيلبي

[بقايا جروحتم التحقق من بقايا جروح كعضو.]

حن الضنين وغايته شوف مضمون
والشوق جمرة هاج وقاح عوده
برقه من التيار أبو نار مشحون
والونه المردوفه أول رعوده
مصدر خياله يدفع مزون بمزون
منسوب همله تعدا حدوده
يسوقه اللي فالشرايين مخزون
والجاذبيه للمحاجر تقوده
تفتق الصدر وطلع كل مسجون
حتى خفير السجن همل جنوده
حاله وفي تأثيرها شاسعه بون
والله مايسلم ضميرن تردوده
من كثر ماضيفتها صارت تمون
نسيت معاريفي وباتت جهوده
يافاتن الأجيال أنا فيك مفتون
يايري حال المشتحن ياوجوده
أرجوك بادر طالب العون بالعون
ترسم عذراته .. وتجديد موده
اللي تبي قادر وحاضر وممنون
واللي تحذر منه ماعاد أعوده
حافظ على حب، مكرم ومصيون
عليه من شرع الهوى ختم جوده
ذوقني اللذات وإبليس ملعون
ترى العمر كله ليالٍ معدوده
مكثف جهودي وهي مادركت لون
من زاد فالتفريط ضاعت جهوده
لا والله إلا عرقلت شاعر الكون
طلاسم فخيوط سحره معقوده
مجنون ليلى معي ماهوب مجنون
صرت أتعلم من جنانه وأزوده
وأنا شريك له بشيلات ولحون
قصايدٍ راحت مع الناس شوده
كلمات : شاعر الكون
سفر الدغيلبي​